|
sutherland
Sinoniem met stilte, sterre, snerpende koue
en sedert November 2005 die reuse-teleskoop, SALT
(Southern African Large Telescope). Dít is die Karoodorpie,
Sutherland, wat seismografies as die stilste plek in die wêreld
aangedui is en met die koudste gemiddelde temperatuur in Suid-Afrika.
Sutherland is ook die geboorteplek van die Louw-digterbroers.
Besoekers kan by die broers se geboortehuis, die Louw
Museum, meer uitvind oor NP van Wyk Louw en WEG Louw
en hul letterkunde. Naas die sterrewag, sowat
16km buite Sutherland in die rigting van Fraserburg, tel die argitektuur
van Sutherland ook onder die besienswaardighede. Die NG
Kerk, ontwerp deur Charles Freeman wat ook verantwoordelik
was vir die ontwerp van die NG Kerk in Graaff Reinet, dateer uit
die vroeë 1900's.
Vir meer inligting oor die Groot Teleskoop, die
Louw Museum, interessante begraafplase op die dorp, 4x4-roetes
en ander dinge om te sien en doen in die Sutherland-omgewing,
besoek http://www.karoohoogland.co.za/
Ons wil graag jou besoek aan Die Prokureurshuis
onvergeetlik maak en daarom vestig ons graag jou aandag op die
volgende spesifieke inligting.
| Mediese
inligting
Daar is nie ‘n apteek op Sutherland nie,
maar wel ‘n dokter. In ‘n noodgeval kan jy die
hospitaal by 023 571 1002 skakel.
Banke
Daar is slegs ‘n tak van Standard Bank op die dorp
wat wel oor ‘n OTM beskik. Slegs enkele sakeondernemings
op die dorp aanvaar kredietkaarte. Ons beveel aan dat jy
genoeg kontant beskikbaar het vir algemene aankope.
Petrol en diesel
Daar is slegs een vulstasie op die dorp – letterlik
om die hoek van Die Prokureurshuis. Brandstof is van Maandag
tot Saterdag vanaf 08:00 tot 17:00 en op Sondae vanaf 11:30
tot 12:30 beskikbaar. Verseker asseblief vroegtydig dat
daar genoeg brandstof in jou motor is aangesien ‘n
betaling van R10 na-ure gevra word.
Selfoonontvangs
Sutherland bied selfoonontvangs vir al die bekende selfoon-netwerkverskaffers.
Hou egter in gedagte dat daar geen selfoonontvangs tussen
Matjiesfontein en Sutherland is nie. Ons beveel aan dat
jy iemand in kennis stel wanneer jy by Matjiesfontein na
Sutherland toe afdraai.
SALT en sterrewag
Die sterrewag is sowat 16km buite die dorp op pad na Fraserburg.
Dagtoere word van Maandae tot Saterdae aangebied en die
koste per persoon is R20. (Moenie verwag om gedurende die
dag enige sterre deur ‘n teleskoop te sien nie!) Nagtoere
word op Maandae, Woensdae, Vrydae en Saterdae aangebied
en die koste per persoon is R40. Alle toere word volgens
afspraak gereël. Skakel gerus vir Karel Klein by 023
571 1205 vir meer inligting en om afsprake te reël.
|
|
|
